1_8_93 సీసము + ఆటవెలది వోలం - వసంత

సీసము

సర్వధర్మజ్ఞుల రుర్వీశపూజ్యుల
        రన్యోన్యనిత్యసౌహార్దయుతుల
రగణితగుణయుక్తిఁ బొగడంగఁ దగువార
        లిట్టి మీకేవుర కిపుడు ద్రుపద
సుత యొక్కతియ ధర్మమతి ధర్మపత్ని యై
        నది యీక్రమంబు లోకాగమంబు
లందు విరుద్ధ మీసుందరికారణం
        బున మీకు విప్రీతి పుట్టకుండ

ఆటవెలది

నుండవలయుఁ బ్రియసహోదరుల్ దొల్లి సుం
దోపసుందు లొక్కయువతి కడరి
విగ్రహించి యసురవీరులు దమలోనఁ
బొడిచి మృత్యునిలయమునకుఁ జనిరి.

(మీ ఐదుగురికీ ఇప్పుడు ద్రౌపది ఒక్కతే భార్య. ఈ పద్ధతి లోకవిరుద్ధం, శాస్త్రవిరుద్ధం. ఆమె కారణంగా మీలో విరోధం పుట్టకూడదు. ఇంతకు ముందు అన్నదమ్ములైన సుందోపసుందులనే రాక్షసులు ఒక స్త్రీకోసం కలహించి మృతిచెందారు.)