Friday, December 08, 2006

1_8_261 సీసము + ఆటవెలది వోలం - వసంత

సీసము

చక్రధరుం డయ్యు జలరుహనాభుండు
గాండీవధరుఁ డయ్యుఁ బాండవుండు
నుండి రవ్వనమువ కుభయపార్శ్వంబులఁ
దొల్లింటి యట్టులు పెల్లు రేఁగి
యనలంబు నార్పంగ నార్చుచుఁ బఱతెంచి
వనరక్షకులు పార్థు సునిశితాస్త్ర
ధారల నవగతదర్పు లై యరిగిరి
యమసదనంబున కమితబలులు



ఆటవెలది

శిఖియు నుగ్రదీర్ఘజిహ్వలు సాచి యు
ద్ధరసమీరణంబు తోడు సేసి
కొని యుగాంతకాల కుపితానలాకారుఁ
డయ్యె ఖాండవమున కద్భుతముగ.

(ఆ వనానికి రెండువైపులా కృష్ణుడు, అర్జునుడు నిలబడ్డారు. ఆ నిప్పును ఆర్పటానికి వస్తున్న వనరక్షకులను అర్జునుడు సంహరించాడు.)

No comments: